Тошкент шаҳрида 18 ёшли қиздан унинг интим сурат ва видеоларини тарқатмаслик эвазига пул талаб қилган йигит қўлга олинди. Бу ҳақда Ички ишлар вазирлиги хабар берди.
Маълум қилинишича, вазирликка интернет тармоғида ёш қизга тегишли интим мазмундаги сурат ва видеоларни тарқатиш билан таҳдид қилингани юзасидан мурожаат келиб тушган.
Терговга қадар текширувларда аниқланишича, Тошкент шаҳрида яшовчи 18 ёшли қиз Instagram ижтимоий тармоғи орқали бир йигит билан танишган. Кейинчалик у муносабатлари жиддий эканини баҳона қилиб, қизнинг интим мазмундаги сурат ва видеоларини юборишига эришган.
Орадан вақт ўтгач, гумонланувчи ушбу материалларни ижтимоий тармоқларда тарқатмаслик эвазига қиздан 300 АҚШ доллари талаб қилган.
Сергели туманида ўтказилган тезкор тадбир давомида у жабрланувчидан 200 АҚШ долларини олаётган вақтида ашёвий далиллар билан қўлга олинган.
Мазкур ҳолат юзасидан Жиноят кодексининг 165-моддаси биринчи қисми (товламачилик) билан жиноят иши қўзғатилган. Ҳозирда тергов ҳаракатлари давом этмоқда.
