Эрон президенти Масъуд Пезешкиан ва ҳукумат расмийлари Теҳронда юзага келган мисли кўрилмаган сув инқирози юзасидан жиддий огоҳлантириш берди. Маълум қилинишича, пойтахтда ичимлик суви захиралари кескин камайган бўлиб, улар икки ҳафта ичида тугаб қолиши мумкин. Ҳолат назоратдан чиқиши эҳтимоли боис, 10 миллиондан ортиқ аҳолининг вақтинчалик эвакуация қилиниши масаласи муҳокама қилинмоқда. Бу ҳақда Zamon.uz хабар берди.
Теҳрон сув таъминоти компанияси раҳбари Беҳзод Парсийнинг билдиришича, шаҳарни сув билан таъминлаб келаётган беш асосий сув омборидан бири — Амир Кабир тўғони ҳозирда қувватининг атиги 8 фоизи, яъни 14 миллион куб метр сувни сақлаб турибди. Таққослаш учун, ўтган йилнинг шу даврида мазкур кўрсаткич 86 миллион куб метрни ташкил этган.
Баҳор ва ёз мавсумларида ёғингарчиликнинг кескин камайиши оқибатида сув омборларидаги сув сатҳи жиддий пасайган. Бу эса ер усти ва ер ости сув манбаларига ҳам салбий таъсир кўрсатган. Теҳроннинг кунлик сув истеъмоли 3 миллион куб метрга яқин бўлиб, сўнгги кунларда айрим ҳудудларда сув таъминоти аллақачон чеклана бошлаган.
