Александр Лукашенко амалдорлардан хавфсизликни таъминлаш мақсадида симли телефонлардан фойдаланишни сўради. Унинг сўзларига кўра, бу қарор “консервативлик билан эмас, балки ахборот хавфсизлиги билан боғлиқ”.
“Телефонингиз бўлса, қаерга борасиз, нима қиласиз — ҳаммаси маълум. У ёқилган ёки ўчирилган бўлишидан қатъи назар, махсус хизматлар сиз ҳақингизда ҳаммасини билади”, — деди Лукашенко.
Президент рақамлаштириш жараёнларига эҳтиёткорлик билан ёндашишни ҳам тавсия этди. Унинг фикрича, айрим ҳужжатлар ва маълумотларни қоғоз шаклида сақлаш мақсадга мувофиқ.
Лукашенко, шунингдек, ўзида мобил телефон йўқлигини маълум қилди: “Менда телефон йўқ, лекин яшаяпман. Ҳатто Республика Кенгаши раҳбари Наталя Кочанова билан ҳам симли телефон орқали гаплашаман”, — деди у.
Беларусь раҳбари бош вазир Александр Турчинга мамлакатдаги симли алоқа тармоғини сақлаб қолиш бўйича кўрсатма берди.
