Ташкилот маълумотида айтилишича, зўравонлик нафақат ҳукумат ёки рақиб гуруҳларга, балки журналистлар, инсон ҳуқуқлари ҳимоячилари ва тадбиркорларга ҳам қаратилмоқда. 2020–2022 йилларда 200 нафар журналист ўлдирилган бўлиб, уларнинг бешдан бири жиноятчиликни фош этгани учун нишонга олинган.
БМТнинг Гиёҳванд моддалар ва жиноятчилик бўйича бошқармаси (UNODC) ҳисоботида таъкидланишича, уюшган жиноятчилик ҳозирги кунда энг хавфли ва тез ўсувчи таҳдидлардан бирига айланган. Глобаллашув, рақамли технологиялар ва геосиёсий беқарорлик туфайли бундай тармоқлар фаолиятини назорат қилиш тобора қийинлашмоқда.
UNODC ҳисоб-китобларига кўра, 2000–2023 йиллар давомида уюшган жиноятчилик ҳар йили ўртача 95 минг одамнинг ҳаётига зомин бўлган. Энг кўп қотилликлар Лотин Америкаси ва Кариб ҳавзасида содир бўлган — бу ҳудудда 100 минг аҳолига 19,7 та қотиллик тўғри келган.
Ташкилот жиноий гуруҳлар фаолияти иқтисодиётга зарар етказиши, инвестиция муҳитини издан чиқариши ва инсон ҳуқуқларини бузишини таъкидлаган. Одам савдоси ва зўравонлик ҳолатлари эса кўпинча давлат тузилмаларига бўлган ишончни пасайтиради.
