Бразилиянинг “Арагуаина” клуби футболчиси Вандерсон Баррос де Соуза укаси ов милтиғини тозалаётганда тасодифан отиб юборган ўқдан ҳалок бўлди. Ҳодиса уйларида содир бўлган.
Poder Goias нашри маълумотига кўра, фожиа 9 ноябрь куни Арагояния шаҳрида рўй берган. Дастлабки маълумотларга кўра, 16 ёшли ука ов милтиғини тозалаётганда эҳтиётсизлик билан тепкини босиб юборган. Ўқ Вандерсоннинг бўйнига теккан ва у воқеа жойида вафот этган.
Полиция ҳодисани “тасодифий ўқ отиш” деб баҳолаб, қуролнинг қаердан олингани ва рухсатномаси бор-йўқлигини текширмоқда. Шунингдек, футболчининг укаси яқин кунларда сўроққа чақирилади.
“Арагуаина” клуби расмий баёнот бериб, футболчининг оиласи ва яқинларига чуқур ҳамдардлик изҳор этди. Клуб спорт директори Силваниу Родригес Кастронинг сўзларига кўра, Вандерсоннинг оиласи оғир руҳий ҳолатда, укаси эса шок ҳолатида экан.
Шаҳар мэрияси спортчи хотирасига ҳурмат сифатида 10 ноябрь куни барча спорт тадбирларини тўхтатди. Тергов ишлари “қасддан бўлмаган ўлдириш” моддаси бўйича давом этмоқда.
Маълумот учун, Вандерсон “Арагуаина”нинг 20 ёшгача бўлганлар жамоасида чап қанот ҳимоячиси сифатида ўйнаган ва маҳаллий мусобақаларда иштирок этган.
