Виржиния университети олимлари 17 йиллик тадқиқот орқали ўсмирлик давридаги тажовузкор хулқ-қаттиқ муносабатлар кейинчалик биологик қаришни тезлаштириши мумкинлигини аниқлади. Тадқиқот натижалари “Journal of Health Psychology” журналида чоп этилди.
Психологлар 1998 йилдан бошлаб 123 нафар ўсмирнинг дўстлари ва ота-оналари билан муносабатларини кузатиб борган, шу билан бирга холестерин, қон босими, глюкоза, яллиғланиш кўрсаткичлари каби биомаркерларни ҳам ўрганган. Мутахассисларга кўра, ушбу кўрсаткичлар инсон соғлиги ва умр давомийлигини башорат қилишда муҳим аҳамиятга эга.
Маълум бўлишича, 13 ёшида дўстларига нисбатан агрессив ёки душманона муносабатда бўлган, шунингдек, отаси билан низоли муносабатга эга бўлган ўсмирлар 30 ёшга келиб биологик қаришнинг тезлашган белгиларига дуч келган. Олимлар айниқса оталар билан ўсмирлик охиридаги зиддиятлар ва 20 ёшлар атрофидаги дўстларга бўлган агрессия энг кучли таъсир кўрсатганини таъкидлайди.
Тадқиқотда бу таъсир ҳам эркакларда, ҳам аёлларда бир хил даражада кузатилгани қайд этилган. Мутахассислар фикрича, инсоннинг болалик ва ўсмирликдаги муносабатлар феъл-атвори юрак-қон томир касалликлари хавфидан ташқари организмдаги умумий эскириш жараёнини ҳам олдиндан кўрсатиб беради.
