АҚШ президенти Дональд Трамп Саудия Арабистонига АҚШнинг энг илғор F-35 ҳарбий самолётларини сотишни режалаштираётганини маълум қилди. У бу ҳақда 17 ноябрь куни Оқ уйда журналистлар билан суҳбат чоғида айтди.
Трамп 18 ноябрь куни Оқ уйда Саудия валиаҳди Муҳаммад бин Салмонни қабул қилиши кутилмоқда. F-35 сотуви амалга ошса, бу Вашингтоннинг ҳозиргача Исроилнинг “сифат жиҳатидан устун ҳарбий имконияти”ни таъминлаш сиёсатига жиддий ўзгариш киритиш бўлиши мумкин.
“Reuters”нинг маълум қилишича, Саудия подшоҳлиги 48 тагача F-35 харид қилиш бўйича АҚШга мурожаат қилган ва потенциал миллиардлаб долларлик битим Пентагондаги асосий босқичлардан ўтган. Саудия бу самолётлар орқали ҳаво кучларини замонавийлаштириш ва минтақавий таҳдидларга, айниқса Эронга қарши туришни мақсад қилган.
Бироқ Конгрессдаги айрим қонун чиқарувчилар бу сотувга қарши чиқиши мумкин — Жамол Қошиқчи қатлидан кейин Саудияга қурол экспорти масаласида кескин танқидлар бўлган.
F-35 — стелс технологиясига эга, душман радарларидан қоча оладиган, дунёдаги энг илғор жанговар учоқлардан бири. Ҳозирча Яқин Шарқда бу тизимга эга ягона давлат — Исроил.
