Индонезиянинг Суматра оролида сув тошқинлари ва кўчкилар қурбонлари сони кескин ошиб, 442 кишига етди, дея хабар бермоқда расмийлар. Якшанба куни эрталаб қурбонлар сони 300 кишига етган эди.
Оролда эвакуация ишлари давом этмоқда, асосий йўллар тўсилган, интернет ва электр таъминоти фақат қисман тикланган.
Тропик бўронлар туфайли кучайган муссонлар Жануби-Шарқий Осиёда сўнгги йилларда энг ёмон сув тошқинларига сабаб бўлди. Малайзия ва Таиландда юзлаб одамлар ҳалок бўлди ва бедарак йўқолди, бутун минтақа бўйлаб миллионлаб одамлар зарар кўрди.
Таиландда расмий қурбонлар сони ҳозирда 170 кишини ташкил этади, Малайзия шимолидаги Перлис штатида яна икки киши ҳалок бўлди.
Шри-Ланкада сув тошқинлари ва кўчкилар сабаб бўлган экстремал об-ҳаво шароити туфайли 160 га яқин одам ҳалок бўлди.
