Ҳужум оқибатида бинонинг юқори қаватлари шикастланган, аммо талафотлар қайд этилмади.
Чеченистон етакчиси Телеграмъдаги мурожаатида “Грозний-Сити”даги баланд бинолардан бирига дрон ҳужуми амалга оширилганини тасдиқлади. Унинг айтишича, бу Украина томонидан тинч аҳолига босим ўтказиш ва қўрқитиш уринишидир.
Қодиров бу ҳаракатни “жанг майдонидаги муваффақиятсизликни фуқаролик объектларига зарба бериш орқали қоплашга уриниш” деб баҳолади ва Украина “жавобни узоқ кутмаслигини” таъкидлади.
5 декабрь куни содир бўлган ҳужум ижтимоий тармоқларда тарқалган видеоларда акс этган — зарба тахминан 28-қаватга тўғри келгани, бир неча қават фасади вайрон бўлгани ва ёнғин чиққани кўринади.
Маълумот учун, “Грозний-Сити” мажмуаси Грозний марказида жойлашган етти осмонўпар бинодан иборат бўлиб, баландлиги 18–40 қаватгача, энг баланд минораси 145 метрни ташкил қилади. Мажмуа 2007–2011 йилларда қурилган.
