Тадқиқот доирасида 50 ёшдан катта бўлган 3 600 нафардан ортиқ киши 12 йил давомида кузатилди. Мутахассислар иштирокчилардан ҳафтасига қанча вақт китоб ўқишини сўраб, бу кўрсаткичларни уларнинг саломатлиги ва умр давомийлиги билан солиштирди.
Натижаларга кўра, ҳафтасига камида 3–3,5 соат, яъни кунига ўртача ярим соат китоб мутолаа қилганларда ўлим кўрсаткичи умуман китоб ўқимаганларга нисбатан қарийб 20 фоизга паст бўлган.
Қизиғи шундаки, бундай ижобий таъсир газета ёки журнал ўқишда деярли кузатилмаган. Тадқиқотчилар бунга сабаб сифатида китоб ўқиш жараёни кўпроқ фикрлаш, тасаввур қилиш ва диққатни жамлашни талаб қилишини, бу эса мия фаолиятини узоқ муддат давомида фаоллаштириб туришини қайд этган.
Мутахассисларнинг таъкидлашича, китоб мутолааси умрни узайтиришга кафолат бермаса-да, стрессни камайтириш, ақлий фаолликни сақлаш ва умумий саломатликни яхшилаш орқали узоқ умр кўриш эҳтимолини оширувчи муҳим омиллардан бири ҳисобланади.
