14 январь куни АҚШ маъмурияти Ғазодаги урушни якунлашга қаратилган стратегик режанинг иккинчи босқичи бошланаётганини маълум қилди. Бу ҳақда “Реутерс” хабар берди. Шу билан бирга, режанинг биринчи босқичида назарда тутилган асосий масалалар, жумладан, Исроил ва ҲАМАС ўртасида тўлиқ сулҳга эришиш ҳали амалга ошмаган.
Қайд этилишича, иккинчи босқич доирасида АҚШ ва воситачи давлатлар қурол топширишдан бош тортаётган ҲАМАСни қуролсизлантириш, шунингдек, Ғазога халқаро тинчликпарвар кучларни жойлаштириш каби мураккаб масалаларни ҳал этиши лозим бўлади. АҚШ президенти Доналд Трампнинг махсус вакили Стив Виткоффга кўра, бу босқич Ғазода ўтиш даври учун технократик Фаластин маъмуриятини шакллантириш, қуролсизланиш ва қайта қуриш жараёнларини бошлашни назарда тутади.
Миср, Қатар ва Туркия воситачиларининг қўшма баёнотига кўра, тузилаётган Фаластин органи 15 нафар аъзодан иборат бўлади. Унга Ғарб томонидан қўллаб-қувватланадиган, Фаластин маъмуриятининг собиқ вазир ўринбосари Али Шаат раҳбарлик қилади. У илгари саноат зоналарини ривожлантириш билан шуғулланган.
Исроил ва ҲАМАС ўтган йилнинг октябрь ойида Трамп режаси доирасида келишувга эришган эди. Унга кўра, Ғазони ўтиш даврида халқаро “Тинчлик кенгаши” назорати остидаги технократик Фаластин органи бошқариши керак. Европалик дипломатнинг айтишича, келаси ҳафта Давос форумида Тинчлик кенгаши бўйича яна бир эълон кутилмоқда.
Исми ошкор этилишини истамаган АҚШ расмийси 14 январь куни Трамп томонидан шахсан танланган Тинчлик кенгаши аъзоларига таклифномалар юборилганини маълум қилган.
Али Шаат радиога берган интервьюсида қўмита аввало Ғазога шошилинч гуманитар ёрдам кўрсатиш, жумладан, кўчирилган фаластинликларни уй-жой билан таъминлашга эътибор қаратишини айтган. Айни пайтда уларнинг аксарияти вайроналар орасидаги вақтинчалик чодирларда яшамоқда.
Шунингдек, Стив Виткофф Трамп режаси иккинчи босқичининг асосий мақсади Ғазони тўлиқ демилитаризация қилиш ва қайта қуриш эканини таъкидлаган. Қайд этилишича, ҲАМАС қурол топширишдан бош тортаётган бўлса-да, ўтган йилнинг октябрь ойида Ғазо бошқарувини технократик қўмитага топширишга розилик билдирган.
Маълумот учун, режанинг биринчи босқичи Исроилнинг Ғазодаги ҳаво ҳужумлари, айрим келишмовчиликлар ҳамда чегара ўтиш пунктлари очилишининг кечикиши сабаб тўхтаб қолган эди. Шунга қарамай, Вашингтон иккинчи босқични бошлашга қарор қилди.
