Яқин Шарқ давлатлари АҚШни Эронга зарбадан қайтаришга уринмоқда
АҚШнинг Яқин Шарқдаги иттифоқчилари Эронга эҳтимолий ҳарбий зарба бутун минтақани қамраб олувчи урушга айланишидан хавотир билдириб, Вашингтонга дипломатик босимни кучайтирмоқда.
“The New York Times” хабар беришича, Исроил бош вазири Биньямин Нетаньяху 14 январь куни АҚШ президенти Дональд Трамп билан суҳбатда Эронга режалаштирилаётган ҳарбий зарбани кечиктиришни сўраган. Нашр бу мулоқотни Эрон атрофидаги кескин вазиятда муҳим бурилиш нуқтаси сифатида баҳоламоқда.
Манбаларга кўра, шу куни Трамп «қарши томондан жуда муҳим ахборот» олганини ва Эронда намойишчиларга нисбатан қатллар тўхтатилганини маълум қилган. NYT талқинига кўра, айнан шу маълумот АҚШ президентининг ҳарбий сценарийдан вақтинча воз кечишига сабаб бўлган.
Нетаньяху билан бир вақтда АҚШнинг бошқа минтақавий иттифоқчилари — Қатар, Ўмон, Миср ва Саудия Арабистони расмийлари ҳам Вашингтон билан боғланиб, Эронга зарба бутун Яқин Шарқни қамраб оладиган можарога айланиши мумкинлигидан огоҳлантирган.
“Financial Times” эса сўнгги кунларда Нетаньяхунинг одатдагидан фарқли равишда сукут сақлаётганига эътибор қаратди. Газета манбаларига кўра, Исроил раҳбарияти Трамп даврида Эрон масаласида “ноёб имконият ойнаси” очилганини англаб турибди, аммо минтақадаги давлатлар учун ҳарбий сценарийдан кўра сиёсий барқарорлик устувор ҳисобланмоқда.
Уларнинг фикрича, АҚШнинг бевосита ҳарбий аралашуви Эрон билан чекланиб қолмасдан, бутун минтақада узоқ муддатли беқарорлик хавфини кучайтиради. Шу сабабли, ҳозирча дипломатик каналлар орқали вақт ютиш ва кескинликни пасайтириш энг мақбул йўл сифатида кўрилмоқда.
