Yaqin Sharq davlatlari AQShni Eronga zarbadan qaytarishga urinmoqda
AQShning Yaqin Sharqdagi ittifoqchilari Eronga ehtimoliy harbiy zarba butun mintaqani qamrab oluvchi urushga aylanishidan xavotir bildirib, Vashingtonga diplomatik bosimni kuchaytirmoqda.
"The New York Times" xabar berishicha, Isroil bosh vaziri Binyamin Netanyaxu 14 yanvar kuni AQSh prezidenti Donald Trump bilan suhbatda Eronga rejalashtirilayotgan harbiy zarbani kechiktirishni so'ragan. Nashr bu muloqotni Eron atrofidagi keskin vaziyatda muhim burilish nuqtasi sifatida baholamoqda.
Manbalarga ko'ra, shu kuni Trump "qarshi tomondan juda muhim axborot" olganini va Eronda namoyishchilarga nisbatan qatllar to'xtatilganini ma'lum qilgan. NYT talqiniga ko'ra, aynan shu ma'lumot AQSh prezidentining harbiy stsenariydan vaqtincha voz kechishiga sabab bo'lgan.
Netanyaxu bilan bir vaqtda AQShning boshqa mintaqaviy ittifoqchilari — Qatar, Omon, Misr va Saudiya Arabistoni rasmiylari ham Vashington bilan bog'lanib, Eronga zarba butun Yaqin Sharqni qamrab oladigan mojaroga aylanishi mumkinligidan ogohlantirgan.
"Financial Times" esa so'nggi kunlarda Netanyaxuning odatdagidan farqli ravishda sukun saqlayotganiga e'tibor qaratdi. Gazeta manbalariga ko'ra, Isroil rahbariyati Trump davrida Eron masalasida "noyob imkoniyat oynasi" ochilganini anglab turibdi, ammo mintaqadagi davlatlar uchun harbiy stsenariydan ko'ra siyosiy barqarorlik ustuvor hisoblanmoqda.
Ularning fikricha, AQShning bevosita harbiy aralashuvi Eron bilan cheklanib qolmasdan, butun mintaqada uzoq muddatli beqarorlik xavfini kuchaytiradi. Shu sababli, hozircha diplomatik kanallar orqali vaqt yutish va keskinlikni pasaytirish eng maqbul yo'l sifatida ko'rilmoqda.
