Канада ҳамда АҚШ актрисаси, режиссёр ва сценарист Кэтрин О’Хара 71 ёшида ҳаётдан кўз юмди. Бу ҳақда Variety нашри хабар берди.
Маълум қилинишича, актриса 30 январь куни Лос-Анжелесдаги уйида қисқа давом этган касалликдан сўнг вафот этган.
Кэтрин О’Хара 1954 йил 4 март куни Торонто шаҳрида туғилган. У илк бор 1979 йилда Canada After Dark телекўрсатувида экранга чиққан. Фаолиятининг дастлабки йилларида асосан мультфильмларни овозлаштириш билан шуғулланган.
Актриса 1990 йилда суратга олинган «Ёлғиз уйда» ҳамда 1992 йилги "Ёлғиз уйда 2: Нью-Йоркда йўқолиб қолган" фильмлари орқали кенг танилган. У мазкур картиналарда Маколей Калкин ижро этган Кевин Маккалистернинг онаси образини гавдалантирган.
Шунингдек, у "Битлджус" фильми ва унинг 2024 йилда чиқарилган давомида Делия Дитц ролини ижро этган. Актрисанинг бошқа машҳур ишлари қаторида "After Hours", "Best in Show" фильмлари, шунингдек "Schitt’s Creek", "The Last of Us" ва "The Studio" сериаллари бор.
Қарийб 50 йиллик ижодий фаолияти давомида Кэтрин О’Хара икки марта "Эмми", "Олтин глобус" мукофоти ҳамда Киноактерлар гильдиясининг икки совринини қўлга киритган.
