Буюк Британия Россиянинг етти нафар фуқароси ҳамда икки илмий-тадқиқот муассасасига нисбатан янги санкциялар жорий қилди. Лондон уларни россиялик мухолифатчи Алексей Навальний ва собиқ разведкачи Сергей Скрипалга қарши қўлланган кимёвий моддаларни ишлаб чиқиш билан боғлиқ фаолиятда иштирок этганликда айбламоқда.
Британия Ташқи ишлар вазирлиги маълумотига кўра, чекловлар 2024 йилда Алексей Навальнийга қарши қўлланган эпибатидин токсини ҳамда 2018 йилда Англиянинг Солсбери шаҳрида Сергей Скрипал ва унинг қизи Юлия Скрипалга қарши ишлатилган «Новичок» асабни фалажловчи моддаси яратилишига алоқадор деб баҳоланаётган шахс ва ташкилотларга нисбатан қўлланилган.
Санкциялар рўйхатига Россиянинг "СС Сигнал" давлат илмий-тадқиқот институти, Ҳарбий тиббиёт бўйича давлат илмий-тадқиқот ва синов институти, шунингдек, бир қатор юқори лавозимли амалдорлар ва олимлар киритилган.
Британия Ташқи ишлар вазири Дэвид Лэмми Россия томонидан кимёвий қуроллардан такроран фойдаланилгани халқаро ҳуқуқнинг қўпол бузилиши ва глобал хавфсизликка жиддий таҳдид эканини таъкидлади.
Шу билан бирга, Буюк Британия Мудофаа вазирлиги Россияга тегишли Ту-142 ("Bear-F") узоқ масофали денгиз патрул самолёти Норвегия денгизи устида парвоз қилганини маълум қилди. Вазирликка кўра, самолёт сувости кемаларини аниқлаш учун мўлжалланган сонобуйларни ташлаган. Шундан сўнг у Британиянинг иккита F-35 қирувчиси томонидан ҳудудни тарк этгунига қадар кузатиб борилган.
