Фарғона вилоятининг Марғилон шаҳридаги мактаблардан бирида эркак 5-синф ўқувчиси ҳамда унинг онасини уриб, тан жароҳати етказгани бўйича жиноят иши қўзғатилди. Бу ҳақда вилоят ИИБ матбуот хизмати маълум қилди.
Маълум қилинишича, 2 март куни “Истиқлол” маҳалласида жойлашган 25-умумий ўрта таълим мактабига келган аёл ўғлини эркак калтаклаётганини кўриб, уларни ажратмоқчи бўлган. Бироқ эркак безорилик ҳаракатларини давом эттириб, аёл ва унинг фарзандига зарба берган.
Ҳолат юзасидан эркакка нисбатан Жиноят кодексининг 277-моддаси 3-қисми “г” банди билан жиноят иши қўзғатилиб, у процессуал тартибда ушланган. Мазкур модда билан айбдор деб топилган шахс 3 йилдан 5 йилгача озодликни чеклаш ёки озодликдан маҳрум қилиш билан жазоланиши мумкин.
