Нашрда таъкидланишича, Тошкент — Марказий Осиёдаги энг йирик шаҳар — ўз тарихи давомида турли цивилизациялар таъсирида шаклланган. Буюк Ипак йўли даври ва араб сулолаларидан тортиб кейинги тарихий босқичларгача бўлган маданий таъсирлар бугунги кунда ҳам шаҳар меъморий қиёфасида намоён бўлиб турибди. Ипак йўли даври ёдгорликларининг кўк гумбазларидан тортиб совет модернизмига хос ифодали меъморий шаклларигача бўлган манзаралар бунинг ёрқин намунасидир.
Нашр, айниқса, Ўзбекистондаги Ислом цивилизацияси марказига алоҳида эътибор қаратган. Мақолада қайд этилишича, мазкур йирик маданий-маърифий мажмуа ислом маданияти, илми ва маънавий мероси тарихига бағишланган музей, кўргазма ва таълим майдонларини ўз ичига олади. Муаллифлар фикрича, Марказнинг барпо этилиши Ўзбекистоннинг жаҳон маданий саҳнасидаги ўрнини мустаҳкамлашга бўлган интилишини ифода этади.
Материалда шунингдек, Тошкентда замонавий маданий муҳитнинг фаол ривожланаётгани ҳам таъкидланади. Жумладан, Замонавий санъат марказининг очилиши ва пойтахтнинг тарихий маҳаллаларида халқаро бадиий резиденцияларнинг пайдо бўлаётгани тилга олинади.
Бу эътироф Ўзбекистондаги Ислом цивилизацияси маркази ҳақидаги маълумотларнинг Smithsonian Magazine, BBC Travel, BBC History ва National Geographic каби нуфузли халқаро нашрлар ва рейтингларда ҳам эълон қилингани билан янада мустаҳкамланмоқда. Ушбу оммавий ахборот воситаларида Марказ ҳақида маълумотларнинг пайдо бўлиши уни жаҳон миқёсидаги йирик музей ташаббуслари — Лос-Анжелесдаги Lucas Museum of Narrative Art, Вашингтондаги National Geographic Museum of Exploration ва Лондондаги London Museum каби муассасалар билан бир қаторга қўймоқда.
Тошкент шаҳри ва Ўзбекистондаги Ислом цивилизацияси марказининг нуфузли халқаро нашр томонидан тавсия этилган саёҳат йўналишлари рўйхатига киритилиши жаҳон ҳамжамиятининг Ўзбекистон маданий меросига бўлган қизиқиши ортиб бораётганини тасдиқлайди ҳамда мамлакатнинг Марказий Осиёдаги муҳим маданий ва туристик марказ сифатидаги мавқеини янада мустаҳкамлайди.
Condé Nast Traveler — саёҳат ва маданиятга ихтисослашган энг таъсирли халқаро нашрлардан бири бўлиб, 1987 йилда АҚШда ташкил этилган. У Condé Nast медиа холдинги таркибига киради. Мазкур холдинг шунингдек Vogue, The New Yorker ва GQ каби машҳур журналларни ҳам нашр этади. Журналнинг ойлик глобал аудиторияси 16 миллиондан ортиқ ўқувчини ташкил этади ва у жаҳон туризм индустрияси учун асосий йўналтирувчи манбалардан бири ҳисобланади, саёҳат ва маданий туризм соҳасида халқаро кун тартибини шакллантиришда муҳим ўрин тутади.
