Жаҳон чемпионати 1/8 финали доирасида ўтказилган Франция — Парагвай (1:0) учрашувини бошқарган ўзбекистонлик ФИФА ҳаками Илгиз Танташевнинг фаолияти қатор хорижий нашрлар ва футбол мутахассислари томонидан танқид қилинди.
Франциянинг L'Equipe нашри ҳамда Archivo VAR таҳлил портали ҳакамлар бригадаси ишини 10 баллик тизимда 1 баллга лойиқ деб баҳолади. Нашрлар фикрича, ҳакам ўйин назоратини қўлдан чиқарган ва бир қатор баҳсли вазиятларда тўғри қарор қабул қила олмаган.
Танқидчиларнинг таъкидлашича, Илгиз Танташев Парагвай футболчиларининг қатор қўпол қоидабузарликларига тегишлича чора кўрмаган, Килиан Мбаппе ва Франциянинг бошқа ўйинчиларига нисбатан ишлатилган фоллар учун карточка кўрсатмаган. Шунингдек, Франция фойдасига белгиланган пенальти ҳам фақат VAR аралашувидан кейин тайинланган.
Қайд этилишича, 1998 йилги жаҳон чемпионатидан буён илк бор Парагвай терма жамоаси мундиал ўйинини бирорта ҳам сариқ карточкасиз якунлади. Учрашув давомида парагвайликлар 13 марта, французлар эса 10 марта қоида бузган. Бироқ сариқ карточкаларнинг барчаси Франция футболчиларига кўрсатилган.
Баҳс давомида бир нечта тортишувли вазиятлар ҳам кузатилди. Айрим мутахассислар фикрича, Парагвай ярим ҳимоячиси Матиас Галарса Фонда икки марта огоҳлантиришдан қутулиб қолган. Майдонда футболчилар ўртасида икки марта оммавий тортишув ҳам юз берган.
Германиялик ҳакамлар бўйича эксперт Патрик Иттрих Илгиз Танташевнинг ишини "фалокатли" деб баҳолаган бўлса, собиқ футболчи Эдуард Мор ҳакам "ўйин ипини қўлдан чиқарганини" таъкидлади.
