Тошкент шаҳри Шайхонтоҳур туманида ўтказилган тезкор тадбирда кўп миқдордаги гиёҳвандлик воситаларини “закладка” усулида тарқатиб юрган шахс қўлга олинди. Бу ҳақда ИИВ маълум қилди.
Маълум қилинишича, ходимлар томонидан Артём исмли шахс текширилганда, унинг чўнтагидан 20 дона қора елимга ўралган “гашиш” топилган. Телефони кўздан кечирилганда эса яна 14 та манзилда беркитилган гиёҳвандлик моддаларининг локациялари аниқланган.
Тезкор тадбир давом эттирилиб, гумонланувчининг яшаш хонадондан 28 дона кўк ва 9 дона қора елимга қадоқланган гиёҳвандлик моддалари, электрон тарози ҳамда бошқа буюмлар топилган.
Унинг айтишича, ушланган пайтида ёнида 20 грамм гиёҳвандлик моддаси бўлган, кейинчалик уйидан ҳам топилган. Ҳолат юзасидан Жиноят кодексининг 273-моддаси 5-қисми билан жиноят иши қўзғатилиб, гумонланувчига қамоқ эҳтиёт чораси қўлланилган.
