Ўзбекистон туманида хизмат вазифасини бажараётган сув таъминоти ходимига нисбатан тажовузкорлик қилиниб, у калтаклангани ҳамда хизмат автомашинасига зарар етказилгани маълум қилинди.
Фарғона сув таъминоти АЖ ахборот хизматига кўра, вилоят ҳудудларида дебитор қарздорликлар ва ноқонуний уланишларни аниқлаш мақсадида назорат рейдлари ўтказилмоқда.
9 март куни Ўзбекистон туманида туман сув таъминоти филиали инспектори ҳамда мижозлар бўлими бошлиғи хизмат вазифасини бажараётган пайтда айрим фуқаролар уларга нисбатан тажовузкор ҳаракатлар содир этган.
Ҳодиса давомида инспектор калтакланган, шунингдек хизмат автомашинасига ҳам шикаст етказилган.
Жабрланган ходимга зудлик билан тиббий ёрдам кўрсатилган. Мазкур ҳолат юзасидан Ички ишлар органларига хабар берилган ва ҳозирда воқеа бўйича суриштирув ишлари олиб борилмоқда.
