Маълум қилинишича, торнадо 6 июль куни кечқурун Хуанши, Хуанган, Эжоу ва Сянин шаҳарларини қамраб олган. Табиий офат вақтида шамол тезлиги соатига 149 километрга етган. Кучли шамол автомобилларни ағдариб юборган, бинолар томларини учириб кетган ҳамда инфратузилмага жиддий зарар етказган.
Хубей метеорология бошқармаси мутахассиси Ван Сяолиннинг таъкидлашича, мазкур ҳудудда торнадо жуда кам кузатилади. Вилоятда бундай ҳодиса сўнгги марта 2021 йил май ойида қайд этилган.
Хитой давлат телевидениеси эълон қилган кадрларда кучли шамол оқибатида вайрон бўлган автомобиллар ва бинолар акс этган. Хитой Раиси Си Цзиньпин қутқарув хизматларига сув тошқинлари ва кўчкилардан жабрланган аҳолига ёрдам кўрсатишни тезлаштириш бўйича топшириқ берган.
Шу билан бирга, Миллий метеорология маркази Хубей вилоятининг шимоли-шарқий қисми, шунингдек, Гуанси, Гуандун, Хайнань, Шандун, Ляонин ва Жилин ҳудудларида яқин кунларда кучли ёмғирлар давом этиши ҳақида огоҳлантирди.
Бундан ташқари, Тинч океанида кучайиб бораётган "Бави" тайфуни Тайвань томон силжимоқда. Синоптиклар унинг 10 июлдан бошлаб оролга таъсир кўрсатишини, айрим ҳудудларда эса бир метрдан ортиқ ёғингарчилик кузатилиши мумкинлигини маълум қилди.
Тайвань ҳукумати эҳтимолий табиий офатга тайёргарлик кўриш мақсадида қарийб 29 минг нафар ҳарбий хизматчини шай ҳолатга келтирган. Мутахассислар прогнозига кўра, "Бави" Тайвань яқинига етиб келганида бироз кучсизланиши мумкин, аммо барибир кучли тайфун сифатида хавф сақланиб қолади.
