Америка Қўшма Штатлари Исроилдан Эрондаги энергетика объектлари, хусусан нефть инфратузилмасига зарбаларни тўхтатишни юқори сиёсий даражада сўрагани маълум бўлди. Бу ҳақда манбаларга таяниб Axios хабар берди.
Маълумотларга кўра, 7 март куни Исроил авиацияси Теҳрон ҳамда унга яқин Караж шаҳридаги нефть омборларига зарбалар берган. Натижада Эрон пойтахтида нефть базаларида юзага келган ёнғинлар оқибатида ҳавога кўтарилган ифлослантирувчи заррачалар сабаб “қора ёмғир” кузатилган.
Исроил расмийларидан бирининг айтишича, Доналд Трумп маъмурияти Исроилдан Эроннинг нефть объектларига режалаштирилаётган ҳар қандай ҳужум ҳақида олдиндан огоҳлантиришни ҳам сўраган. АҚШ бунга бир неча сабабни келтирган: бундай зарбалар Эрон фуқароларига зарар етказиши, урушдан кейин Эрон нефть сектори билан ҳамкорлик қилиш режалари ҳамда бу ҳаракатлар Теҳрон томонидан Форс кўрфази давлатларининг энергетика инфратузилмасига жавоб ҳужумларини келтириб чиқариши мумкинлиги.
Ахиос таъкидлашича, можаро бошланганидан бери АҚШ илк бор Исроил ҳарбий ҳаракатларини чеклашга уринмоқда. Шунингдек, Вашингтон Эрон нефть объектларига янги зарбалар жаҳон нефть нархининг кескин ошишига олиб келишидан хавотир билдирмоқда.
