Аввалроқ Тошкент шаҳридаги Темур Малик ва Буюк Ипак йўли кўчалари кесишмаси яқинидаги янги туннель йўлида тиргак деворнинг бир қисми қисман ўпирилиб тушгани ҳақида хабар берилганди. Мазкур ҳодисадан сўнг йўлнинг бир қисми вақтинча ёпилди. Бу ҳақда пойтахт ҳокимлиги маълум қилди.
Қайд этилишича, йўл ҳаракати хавфсизлигини таъминлаш ҳамда зарур техник ишларни амалга ошириш мақсадида Темур Малик кўчасининг Мирзо Улуғбек кўчаси билан кесишмасидан Султония кўчаси кесишмасигача бўлган қисми барча автотранспорт воситалари ҳаракати учун вақтинча ёпилган.
Шу билан бирга, Буюк Ипак йўли кўчаси бўйлаб ҳаракатланиш чекланмайди. Бироқ ушбу кўчадан Темур Малик кўчасига тушиш ва чиқиш йўллари вақтинча ёпилади.
Мазкур чекловлар таъмирлаш ишлари тўлиқ якунлангунга қадар амал қилади. Ҳайдовчилардан йўналишларни олдиндан режалаштириш, вақтинча ўрнатилган йўл белгиларига ҳамда масъул хизматлар ходимлари кўрсатмаларига амал қилиш сўралган.
Дастлабки тахминларга кўра, йўл ўпирилишига сўнгги кунлардаги кучли ёғингарчилик, тупроқнинг ҳаддан ташқари намланиши ҳамда конструкцияга тушадиган юклама ортиши сабаб бўлиши мумкин. Шу билан бирга, лойиҳавий ечимлар, қурилиш-монтаж ишлари сифати ва дренаж тизими ҳолати ҳам текширилмоқда.
