Қирғизистон Миллий хавфсизлик давлат қўмитаси собиқ раиси Қамчибек Ташиев 19 март куни мамлакатга қайтиб, Ички ишлар вазирлигининг Бош тергов бошқармасига олиб борилди ва сўроқ қилинди. Бу ҳақда “Sputnik” хабар берди.
Ташиев хориждан келганидан сўнг соат 10:00 атрофида дарҳол тергов идорасига олиб борилган. Ҳозирча Ички ишлар вазирлиги бу маълумотни расман тасдиқламаган ва Ташиевнинг тергов доирасидаги процессуал мақоми ҳам очиқланмаган.
Маълумотларга кўра, у 17 февралдан бери мамлакат ташқарисида бўлган. Аввал Германияда даволанишини тўхтатиб ватанига қайтган, бир неча кундан сўнг яна хорижга чиққан.
10 февраль куни Қамчибек Ташиев Президент Садир Жапаров фармони билан лавозимидан озод этилган ва бу қарорини жамиятда бўлинишга йўл қўймаслик истаги билан изоҳлаган. Унинг истеъфосидан сўнг Миллий хавфсизлик давлат қўмитасида бир қатор лавозимларда ўзгаришлар амалга оширилган.
Қамчибек Ташиев ва Садир Жапаровнинг кўп йиллик ҳамкорлиги мамлакатдаги энг барқарор сиёсий тандемлардан бири ҳисобланиб келган. 2020 йил октябрь воқеаларидан сўнг уларнинг тандеми янада мустаҳкамланган ва Ташиев хавфсизлик тизимининг асосий фигурасига айланган.
Ҳозирги сўроқ жараёни ва унга нисбатан қўзғатилган жиноят ишлари Қирғизистонда сиёсий ва ҳуқуқий жиҳатдан жиддий аҳамиятга эга ҳисобланади.
