Хабарларга кўра, кемалар Эронга қарши ҳаракатларда иштирок этмаса ва хавфсизлик талабларига риоя қилса, Теҳрон билан келишилган ҳолда бўғоздан хавфсиз ўтиши мумкин. Эрон ташқи ишлар вазири Аббос Ароқчи бу имтиёз фақат айрим давлатларга берилаётганини таъкидлади. Унга кўра, Хитой, Россия, Ҳиндистон, Ироқ ва Покистон кемаларига ўтишга рухсат берилган.
Кузатувчилар сўнгги кунларда Эрон айрим танкерларни ўз ҳудудий сувларидан ўтказиб, уларни текшираётган бўлиши мумкинлигини қайд этмоқда. Айрим ҳолатларда, асосан Хитойга тегишли кемалар аввал ҳам ўтказилгани айтилмоқда.
Маълумки, Ҳормуз бўғози Форс кўрфазини очиқ океан билан боғлайдиган стратегик йўл бўлиб, у орқали жаҳон нефтининг қарийб 35 фоизи ва суюлтирилган газнинг катта қисми ташилади.
Аввалроқ АҚШ ва Исроил томонидан Эронга қарши ҳарбий ҳаракатлар бошланганидан сўнг, Теҳрон бўғозни ёпиб, айрим кемаларга ҳужум қилгани хабар қилинган. Шу вақтдан бери камида 22 та кема ҳужумга учраган, минглаб кемалар эса Форс кўрфазида тўхтаб қолган.
22 март куни АҚШ президенти Дональд Трамп Эронни 48 соат ичида бўғозни очишга чақирган ва акс ҳолда энергетика объектларига зарба бериш билан таҳдид қилган эди. Кейинчалик бу режа музокаралар фойдасига вақтинча тўхтатилган.
ОАВ маълумотларига кўра, Эрон можарони ҳал этиш учун бир қатор шартларни илгари сурган. Улар орасида минтақадаги барча фронтларда ҳаракатларни тўхтатиш, уруш қайта такрорланмаслиги учун механизмлар ишлаб чиқиш, етказилган зарар учун товон тўлаш ва Теҳроннинг Ҳормуз бўғози устидан назоратини тан олиш каби талаблар бор.
