АҚШ Олий суди федерал чегара хизмати ходимларига айрим ҳолатларда грин карта эгаларини мамлакатга киритмаслик ва уларнинг доимий яшаш мақомини бекор қилиш имконини берувчи қарор қабул қилди. Бу ҳақда ABC News хабар берди.
Маълум қилинишича, мазкур қарор жиноят содир этганликда гумон қилинаётган грин карта эгаларига нисбатан татбиқ этилади. Суд қарорига кўра, чегара хизмати ходимлари шахсни жиноят билан боғлиқ деб ҳисобласа, унинг АҚШ ҳудудига киришига рухсат бермаслиги мумкин.
Эътиборлиси, қарорда чегара хизмати ходимларидан шахснинг жиноят содир этганини тасдиқловчи аниқ далилларни тақдим этиш талаб қилинмайди. Бунда «ишониш учун етарли эҳтимолий асос» мавжуд бўлиши кифоя ҳисобланади.
Шу билан бирга, янги тартиб АҚШнинг кириш пунктларида грин карта эгаларига берилган қонуний доимий яшаш мақоми (LPR)ни бекор қилиш жараёнини ҳам соддалаштиради.
Амалдаги иммиграция қонунчилигига мувофиқ, АҚШдан қисқа муддатга чиққан грин карта эгалари мамлакатга қайтишда қайта кириш ҳуқуқини сақлаб қолади. Бироқ мазкур қоида жиноят содир этганликда айбдор деб топилган ёки айбини тан олган шахсларга нисбатан татбиқ этилмайди.
Олий суднинг айрим аъзолари ушбу қарорга қарши чиққан. Улар ҳукумат грин карта эгасининг қонуний доимий яшаш мақомини бекор қилишдан олдин унинг ҳақиқатда жиноят содир этганини исботлаши лозимлигини таъкидлаган.
