Маълум бўлишича, республика банкларидан бирининг Андижон вилояти бош бошқармаси бошлиғи ўринбосари кредит таъминоти учун гаровга қўйилган мулкларни аукцион ва тўғридан-тўғри сотувга чиқариш ваколатига эга бўлган ҳолда хизмат мавқеидан шахсий манфаат йўлида фойдаланган.
У кредит таъминоти сифатида гаровга қўйилган, Асака туманида жойлашган, умумий баҳоси 16,8 млрд сўмлик хусусий даволаш марказининг 4 қаватли биноси аукционда сотилмай қолганидан фойдаланган. Мансабдор ушбу мулк нархини 12 млрд сўмга тушириб, банк ҳисобига олиш ҳамда маҳаллий тадбиркорга аукционсиз 7 йил муддатга фоизсиз кредит ҳисобидан олиб бериш эвазига 90 минг АҚШ доллари талаб қилган.
Давлат хавфсизлик хизмати ходимлари томонидан ўтказилган тезкор тадбирда у 40 минг АҚШ долларини олган вақтида ашёвий далиллар билан ушланди.
