АҚШ Венесуэладаги эски тадқиқот реакторида сақланган барча бойитилган уранни мамлакат ҳудудидан олиб чиқиб кетди. Бу ҳақда The Guardian нашри АҚШ Энергетика вазирлиги баёнотига таяниб хабар берди.
Вазирлик маълумотига кўра, гап 13,5 килограмм бойитилган уран ҳақида кетмоқда. Операция Венесуэла ва Буюк Британия билан ҳамкорликда амалга оширилган. АҚШ Энергетика вазирлиги ушбу жараённи "Америка, Венесуэла ва бутун дунё учун ғалаба" деб атади.
Халқаро атом энергияси агентлиги маълум қилишича, уран "мураккаб ва ўта сезгир операция" доирасида Жанубий Америкадан Шимолий Америкага қуруқлик ва денгиз орқали хавфсиз тарзда ташилган.
Материал Венесуэла пойтахти Каракасдан тахминан 15 километр узоқликдаги объектдан олиб чиқилган. Кейинчалик у АҚШнинг Жанубий Каролина штатидаги мажмуага етказилган.
АҚШ вазирлиги баёнотида операция Президент Дональд Трампнинг қатъий етакчилиги туфайли амалга ошгани ҳам таъкидланган.
