Ўзбекистон Республикаси Президенти Шавкат Мирзиёев бугун, 14 июль куни мамлакатимизга амалий ташриф билан келган Италиянинг Тоскана вилояти губернатори Эуженио Жани бошчилигидаги делегацияни қабул қилди.
Учрашувда Ўзбекистон ва Италия ўртасидаги стратегик шериклик муносабатларини янада ривожлантириш, айниқса, савдо-иқтисодий, инвестициявий ҳамда маданий-гуманитар соҳалардаги ҳамкорликни кенгайтириш масалалари муҳокама қилинди. Шунингдек, ҳудудлараро алоқаларни фаоллаштиришга алоҳида эътибор қаратилди.
Томонлар кейинги йилларда икки давлат ўртасида барча даражадаги мулоқотлар фаоллашганини қайд этди. Хусусан, жорий йил бошидан буён ўзаро савдо ҳажми 25 фоизга ошган. Бугунги кунда Ўзбекистонда Италиянинг етакчи компаниялари иштирокида металлургия, энергетика, қишлоқ хўжалиги, кимё саноати ва бошқа тармоқларда қатор инвестиция лойиҳалари амалга оширилмоқда.
Президент Тоскана вилояти билан тўқимачилик, чарм-пойабзал, озиқ-овқат, заргарлик саноати, қурилиш, таълим, маданият ва туризм соҳаларида ҳамкорликни ривожлантириш учун катта салоҳият мавжудлигини таъкидлади.
Учрашув якунида Тоскана вилояти ва Ўзбекистон ҳудудлари ўртасидаги ҳамкорликни янада кенгайтиришга қаратилган янги лойиҳалар ҳамда ташаббусларни ўз ичига олган қўшма "йўл харитаси"ни ишлаб чиқиш ва қабул қилиш бўйича келишувга эришилди.
