Фарғона вилоятининг Қўқон шаҳрида жамоат жойида уятли сўзларни ишлатган эркакка 10 сутка маъмурий қамоқ жазоси тайинланди. Ҳолатга алоқадор аёл эса жаримага тортилди.
Маълум қилинишича, Қўқон шаҳрининг Туркистон кўчасидаги автобекатда эркак ва аёлнинг хатти-ҳаракатлари профилактика инспектори эътиборини тортган. Инспектор уларга жамоат жойидаги хулқ-атвор қоидаларига риоя қилиш зарурлигини тушунтириб, таксига ўтқазиб жўнатган.
Бироқ эркак автомобильга ўтирганидан кейин уятли сўзларни ишлатган. Унинг хорижий фуқаро билан суҳбати видеога олиниб, ижтимоий тармоқларда тарқалган.
Ҳолатни ўрганиш давомида видеони тарқатган шахс Қўқонга саёҳат мақсадида келган хорижий фуқаро экани ва у эркак билан аввалдан таниш бўлмагани аниқланган.
Эркак ўз изоҳида автомобиль эшигини ёпаётганда оёғини қисиб олгани ва оғриқ сабаб ноўрин сўзларни ишлатиб юборганини билдирган.
Ҳолатга оид ҳужжатлар Қўқон шаҳар судига юборилган. Суд қарорига кўра, эркакка 10 сутка маъмурий қамоқ жазоси тайинланган, аёл эса жаримага тортилган.
