Швейцариянинг Цюрих шаҳрида 9 январь куни кечаси ФИФА томонидан 2016 йилнинг энг яхшиларини тақдирлаш маросими ўтказилди.
2016 йилнинг энг яхши мураббийи деб “Лестер” бош мураббийи Клаудио Раньери эълон қилинди. У бу борада Фернанду Сантуш (Португалия терма жамоаси) ва Зинедин Зиданни (“Реал Мадрид”) ортда қолдирди. Ғолибга совринни жаҳон футболи юлдузи Диего Марадона топширди.
Энг яхши аёл мураббий номига Германия аёллар термаси устози Силвия Найд сазовор бўлди.
Эслатиб ўтамиз, "Реал" клуби ва Португалия терма жамоаси ҳужумчиси Криштиану Роналду 2016 йилнинг энг яхши футболчиси, АҚШ аёллар термаси форварди Карли Ллойд эса йилнинг энг яхши аёл футболчиси деб топилганди.
