2026 йилда Ўзбекистонда илк бор 5 миллион тоннадан ортиқ пахта хомашёси етиштирилди. Бу мамлакат пахтачилиги тарихидаги энг юқори кўрсаткич ҳисобланади.
Маълум қилинишича, сўнгги йилларда пахта ҳосилдорлиги гектарига 21 центнердан 56 центнергача ошган. Жорий йилда қарийб 400 минг гектар майдонда ўртача ҳосилдорлик 70 центнерни ташкил этган. Қарийб 70 минг гектар майдонда эса ҳар гектардан 100–110 центнергача пахта олинган.
Қайд этилишича, бундай натижага эришишда илм-фан ва ишлаб чиқариш интеграциясини кучайтириш, олимларнинг илмий ишланмалари ва тавсияларини амалиётга татбиқ этиш муҳим аҳамият касб этган.
Шунингдек, маҳаллий тупроқ-иқлим шароитига мос, серҳосил навлардан фойдаланиш, замонавий агротехнологияларни жорий этиш ва сув тежовчи усулларни кенгайтириш ҳосилдорлик ошишига хизмат қилган.
Маълумотларга кўра, пахтачиликда сув сарфи 1990-йилларга нисбатан икки баробар камайган.
Жорий йилда етиштирилган пахтанинг 85 фоизи 3 мингдан ортиқ замонавий пахта териш машинаси ёрдамида 30–35 кун ичида йиғиб олинган. Жиззах ва Сирдарё вилоятларида механизациялашган терим даражаси 100 фоизга етган.
Шу билан бирга, жорий йилда фермер хўжаликларининг пахта етиштиришдан 13–14 триллион сўм соф фойда олиши кутилмоқда.
Келгуси йилда эса пахта ҳосилдорлигини ўртача 65–70 центнерга етказиш мақсад қилинган. Бунинг учун серҳосил навлар, агродронлар, сув ва энергия тежовчи технологиялар ҳамда сунъий интеллект имкониятларидан фойдаланиш режалаштирилган.
