​Эрингизнинг кўнглини тополмаяпсиз!? Сабаби йўл қўйилаётган 7 хатода

Баъзан, тирноқ остидан кир қидириш, одати ўз-ўзидан қайнонадан унинг ўғлига ўтганини сезиб, ёқа ушлаб қоласиз. Севимли «дадажониси»ни ичингизда «онангга ўхшамагур», деб қарғаб ҳам қўясиз. Бироқ, масала шу билангина ҳал бўлса қанийди… Бўлмайди-да!

Турмуш ўртоғингизга дабдурустдан лаб бўёғингизнинг ранги, овқатингизнинг таъми, кўйлакларингизнинг узун-калталиги ёқмай қолса, камига дидингизни ҳам танқид қиладиган одат чиқарса хаёлингизга келадиган биринчи таҳмин нималигини яхши биласиз. Ҳа, худди ўша «бошқасини топганмикан», деган шубҳа. Ўзи биз аёллар зап гумондормизда! Келинг, ундан кўра масалани ҳовлиқмасдан таҳлил қилиб кўрайлик. Балки муаммо эрингизнинг инжиқлиги эмас, сизнинг бепарволигингиздадир? Хўш йўл қўяётган хатоларимиз нималардан иборат?

1-хато. Турмушга чиққандан кейин, «ёқтирадигани ёқтириб бўлди, энди ойна олдидаги машаққатли машқлардан иборат гўзаллик соатлари шарт эмас», деб ўзингизни жуда бўш қўйдингиз. Эркаклар эса тўйдан кейин ҳам кўзи билан яхши кўраверади. Шундай экан унинг ташқи кўринишингиз ҳақидаги бирор эътирозини эътибордан четда қолдиришга ҳаққингиз йўқ.

Ечим. Ҳеч қачон гўзаллигингизга қўшимча зеб беришга эринманг! Ошхонада куймалашганда ҳам, дўконга чиққанда ҳам кўринишингиз аъло бўлсин. Ҳафсала қилсангиз, уй кийимини-да ўзига хос бичимдагисини танлаб кийиш мумкин. Дам олиш кунлари бўянмаслик учун баҳона бўла олмайди.

2-хато. Турмуш ўртоғингизга ҳаддан ортиқ босим ўтказиб, ҳар бир ишини танқид қилаверсангиз («уфф, кўйлак ёқасини бир кун киймай кир қилавераркан-да!»), у ҳам сизга худи шу тариқа жавоб беради. Унинг инжиқлиги сезиладию, ўзингиздан ўтганини сезмайсизда?!

Ечим. Эркакларга эркинлик керак. Бу уларнинг ҳаёт мазмуни. Эрингиз истаганидек иш тутишига имкон беринг. Стулни тузата олмаслиги, аксинча борини ҳам бузиб қўйишини билсангизда, бу борада аччиқ гап айтишдан тийилинг. Йўл қўйган хатоларига ўзи амин бўлсин. Турмуш ўртоғингиз баъзан дўстлари даврасида кечгача ўтиришига қаршилик қилиш ҳаддан зиёд худбинлик.

3-хато. Бошидан ўзингизни жуда бўш қўйганингиз сабаб, у сизни ҳар бир ишда танқид қилиб, камситишга кўникиб қолгандир? Унинг инжиқликларига ўзингиз сабабчисиз! Уни ҳаддан зиёд севганингиз сабаб, кўнглини топиш учун барча айтганига кўнгансиз. Бегингиз эса бунга кўникиб қолган.

Ечим. Ўзингизни ҳурмат қилишни ўрганинг! Кўнглингизга ёқмаётган таклифларга «йўқ», дейишдан қўрқманг. Тўғри, дастлаб қўйдек ювош хотиннинг гап қайтараётгани эрингизни ҳайратлантиради. Аммо инжиқликларию, жеркишлари ҳиқилдоғингизга келганини ётиғи билан, қоғозга ўраб тушунтирсангиз, келишмовчиликлар барҳам топади.

4-хато. Жуфтингиз сизни шунчалик севадики, сиздек аёлни сақлаб қолишнинг энг қулай усули ўз муҳаббатига лойиқ кўриб, ҳиммат қилганини миянгизга сингдириш деб ўйлайди. Сизни йўқотиб қўймаслик учун танқид қилавериб ўзингизга ишончингизни синдиришни истайди. Ўзини сиздек «ўртамиёна» одамга марҳамат кўрсатаётган шаҳаншоҳлардек тутишдан лаззатланади. Чунки у ўзига ишонмайди.

Ечим. У ўзига ишонмайди, шу учун ҳар нарсада сиздан шубҳаланади. Ишончсизлиги, танқидлари билан дилингизни ранжитади. Эрингизга ўзига ишонишни ўргатинг. Бунинг учун уни қанчалар севишингиз, қадрлашингизни ҳар куни исботлашингиз, айтишингиз керак. Акс ҳолда бутун умр гумону, камситишларга чидаб яшашингизга тўғри келади.

5-хато. Турмуш ўртоғингиз атрофдагилар унга гап-сўзсиз бўйсунишларига шунчалар ўрганиб қолганки, сизни ҳам уларнинг бир қисми сифатида кўради. Шунинг учун унга ёқмаган бирор масала ё вазият юзасидан дарҳол норозилигини билдиради.

Ечим. У билан тенг ҳуқуқли эканингизни тушунтириш осон кечмайди. Шахсий «мен»ингиз борлигини исботланг. Шундагина у сизни ҳурмат қила бошлайди ва танқид қилишдан олдин ўз фикрини тарозига қўйиб кўришни ўрганади.

ГУЛНОЗА