Эдгар Гесс “Динамо” бош мураббийи этиб тайинланди

2016 йилги мавсум натижасига кўра Олий Лигага қайтган Самарқанднинг “Динамо” жамоаси мураббийлари штабида ўзгариш юз берди. Бу ҳақда "Динамо" матбуот хизмати хабар бермоқда.

“Динамо”ни Олий Лигага қайтарган жамоа бош менежери Илҳом Шарипов саломатлигини тиклаш мақсадида ҳамда бош менежер сифатида шартномаси якунлангани сабабли жамоага бош мураббий этиб тажрибали мутахассис Эдгар Гесс тайинланди. Илҳом Шарипов соғлиғини тиклаш билан бирга клуб раҳбариятидаги фаолиятини давом эттиради. Учқун Қобилов ва Рафаэль Баласанян янги бош мураббийга ёрдам беради.

Маълумот учун, Эдгар Яковлевич Гесс 1954 йил, 14 март куни таваллуд топган. Мурабийлик фаолияти давомида “Пахтакор” (1986), “Зарафшон” (1987–1988), “Миттельбиберах” (Германия, 1991–1995 ва 1997–1999), “Туркспор”” (Германия, 1999–2003), “Олмаота” (Қозоғистон, 2004), “Алания” (Россия, 2005), “Ветра” (Литва, 2006), “Андижон” (2006–2007), “Насаф” (2008), “Шўртан” (2009–2011 ва 2012–2013), “Бухоро” (2013–2014), “Андижон” (2014–2015) клубларида ишлаган.