Одессалик Лада Лаферова ўзининг Facebook саҳифасида кимдир каптарларга ташлаган нон ушоғини териб еяётган аёлнинг суратини жойлаштирди, деб хабар берди “Tvzvezda.ru” нашри.
Воқеага гувоҳ бўлган қизнинг айтишича, қорни оч қолган украиналик аёл каптарларни қувиб, ерда ётган нон бўлагини шошилганча оғзига солган.
“Кимдир каптарларга нон отди, шунда бир аёл қушлар тўдасига ўзини урди. У аввалига секингина каптарларнинг олдига ўтирди, атрофга аланглаб, ҳеч ким йўқлигига ишонч ҳосил қилгач, ерда ётган нон бўлагини оғзига тиқди”, деб ёзди Лада Лаферова.
Воқеага гувоҳ бўлган яна бир бола етаклаган аёл, қўлидаги сумкадан озиқ-овқат олиб, бечора аёлга ҳадя этган. Лара Лаферова бу воқедан ларзага келганини, мамлакатни шу аҳволга келтириб, халқини оч қолдирган одамларга нисбатан нафрат уйғонганини қўшимча қилди.
