​Қирғизистонда 6 кишидан иборат оила кўчки тагида қолди

Қирғизистоннинг Ўш вилояти Ўзган туманида содир бўлган кўчки оқибатида 6 киши ҳалок бўлди, деб хабар берди Tengrinews.kz нашри.

Тоғли қишлоқдаги бир оила лой оқими остида қолди. Уйда бўлган 6 киши, шу жумладан 4 нафар бола кўчки тагида қолиб, ҳалок бўлган. Болаларнинг энг кичиги 1,5 ёшда, каттаси эса 7 ёшда бўлган.

Қирғизистон республикаси ФВВнинг берган маълумотига кўра, кўчки ҳамон давом этаётганлиги сабабли қутқарувчилар қидирув ишларини давом эттира олмаяпти. Ҳозирда воқеа жойида 39 нафар қутқарувчи иш олиб бормоқда. Яқин орада жойлашган уйларда яшовчи фуқаролар қишлоқ мактаби ҳудудига эвакуация қилинган. ФВВ уларга махсус палаткалардан жой ажратиб, иссиқ овқат ташкил этган. Мазкур ҳудудда 135 та уй кўчки тагида қолиши хавфи мавжуд. ФВВ мутахассислари бундан катта моддий зарар кўриш мумкинлигини тахмин қилмоқда. “Кўчки ҳамон тўхтамаганлиги боис, қутқарув ишларини амалга оширишнинг иложи бўлмаяпти. Ҳозирча маҳаллий аҳолини бехатар жойга кўчириш ишлари билан бандмиз. Камроқ моддий зарар кўриш учун лой оқимининг ҳаракатини ўрганмоқдамиз”, - деб маълумот берди Ўш вилояти ФВВ бошлиғи Дайир Каримов.

Мазкур ҳудудда яшовчи аҳоли илгари ҳам ФВВ томонидан кўчки ҳақида огоҳлантирилиб, кўчиш, янги уй қуриш учун ссудалар ажратилганига қарамай, улар кўчишга шошилмаган.