13 апрель куни пойтахтимизнинг “Версал” ресторанида Ўзбекистон халқ артисти, Алишер Навоий номидаги Давлат мукофоти соҳиби Шерали Жўраев ўз таваллуд куни муносабати билан дастурхон ёзди.
Тантанага “Даракчи” газетаси ижодкорлари Рустам Жабборов ва Дилфуза Собировалар ҳам таклиф этилди.
Тадбирда ҳофизнинг ҳаёти ҳақида ўзи ва дўстлари томонидан бир қанча қизиқарли маълумотлар келтирилди.
Шерали Жўраевнинг айтишича, у Мустақиллигимизнинг илк йилларида Ўзбекистоннинг Биринчи Президенти Ислом Каримов билан Ҳаж зиёратига борган ва зиёрат давомида Муқаддас Каъбатуллоҳга кириш бахтига муваффақ бўлган. Шундан буён ҳофиз шу кунни ўзининг туғилган куни сифатида нишонлайди.
Тадбирга кўпгина чет давлатлардан меҳмонлар ташриф буюришди. Жумладан, Тожикистондан халқ артисти Жўрабек Муродов, Москвадан фазогир Солижон Шарипов ҳамда Туркия ва Уйғур автоном Республикаларидан ҳам меҳмонлар ҳофизни табриклаш учун келишди.
Тадбирни Ўзбекистон халқ артисти Фарруҳ Зокиров очиб берди. Тадбирга кўзга кўринган ўзбек санъати намоёндалари, адабиётшунос-олимлар, шоир ва ёзувчилар, академиклар ҳамда Шерали Жўраевнинг ашаддий мухлислари ташриф буюришди.
