Тошкентда 13 май куни "Соғлом аёл — соғлом авлод" анъанавий баҳорги аёллар веломарафони бўлиб ўтди.
Веломарафон ҳар йили 15 май куни нишонланадиган Халқаро оила куни муносабати билан ўтказилди. Унда 18-30, 31-45 ва 45 ёшдан юқори тоифаларда хотин-қизлар иштирок этишди.
Марафон ғолибларни қутлаш маросими ҳамда санъаткорларнинг чиқишлари билан ниҳоясига етди. Ўзбекистонлик айрим эстрада юлдузлари ва таниқли спортчилар ҳам веломарафонда қатнашишди.
Аёллар марафони Ўзбекистон велоспорт федерацияси ва UNFPA ҳамкорлигида ташкил этилди. Тадбирни ўтказишдан асосий мақсад аёллар ўртасида соғлом турмуш тарзини тарғиб қилишдир.
