Туркиянинг АҚШдаги элчихонаси олдида бўлиб ўтган намойиш вақтидаги тўқнашув оқибатида тўққиз киши жабрланди, деб хабар берди Tvzvezda.ru нашри.
The Washington Post, газетасининг маълумот беришича, турли даражада тан жароҳати олган одамлар касалхонага ётқизилган. Мазкур “қўл жанги”да Ражаб Тойип Эрдўған тарафдорлари ва унинг сиёсатига қарши бўлган одамлар иштирок этган.
Полиция элчихона биноси атрофини қуршаб олди ва мушлашаётган одамларни куч билан ажратди. Бир-бирини аёвсиз равишда калтаклаган одамларнинг баъзиларига тезкор тиббиёт хизмати кўрсатиш зарур бўлди. Иштирокчиларнинг икки нафари оғир аҳволда касалхонага олиб кетилди.
Туркия президенти Ражаб Тойип Эрдўғаннинг Вашингтонга қилган ташрифи намойиш ўтказилишига сабаб бўлди. Аввалроқ Эрдўған АҚШ президенти Дональд Трампни оиласи билан Туркияга таклиф қилган эди.
