Америкалик боксчи, ярим енгил вазн тоифасидаги Даниэль Франко ватандоши Хосе Харо билан бўлган жангдаги мағлубият — нокаутдан кейин комага тушди, деб хабар берди Ntv.ru нашри.
Америкалик боксчилар ўртасида мазкур жанг 10 июнь куни АҚШда бўлиб ўтди. Саккизинчи раундда Франко нокаутга учрагандан кейин ҳакам мусобақани тўхтатди. Франко замбилда касалхонага олиб кетилди. Врачлар мияга қон қуюлишининг олдини олиш мақсадида жарроҳлик операциясини ўтказишди. Операциядан кейин 25 ёшли боксчи тиббий кома ҳолатига туширилди.
“Шифокорлар келгуси 48 соат Франконинг тўлиқ ўзига келишида ҳал қилувчи соатлар бўлишини айтди. Боксчилар ҳамжамиятидан унинг тузалиши учун дуо қилишларини сўрайман”, деди боксчининг менежери Рэй Чапарро.
Даниэль Франконинг ҳисобида профессионал рингдаги 16 та ғалаба, 2 мағлубият ва 3 та дуранг мавжуд.
