Полициячилар Адлер вокзалида Калининград шаҳрида яшовчи бувисиникига бориш учун ёлғиз йўлга чиққан 8 ёшли қизчани қўлга олди, деб хабар берди Ntv.ru нашри.
Адлер шаҳар темирйўл бекатида турган қизчага транспорт полицияси ходимларининг кўзи тушди. Қизча ёлғиз бўлиб, қўлига аёллар сумкачаси ва улкан чамадонни тутиб олганди. У полициячиларга вокзал биносида ота-онаси кутаётганлигини билдирди, аммо унинг сўзлари ёлғон бўлиб чиқди.
Қизча вояга етмаганлар билан ишлаш бўлимига олиб келинди. Бу ерда кичкина “саёҳатчи” ёзги таътилни ўтказиш учун Калининграддаги бувисиникига бормоқчи бўлганлигини, ота-онаси унга кам вақт ажратишини, эътибор бермаслигини маълум қилди. Полициячилар қизча билан профилактик суҳбат ўтказди, у иккинчи маротаба уйдан қочиб кетмасликка ваъда берди. Шундан кейин қизча ота-онасининг қўлига топширилди.
