Президент томонидан тайинланган Халқ таълими вазири ўринбосари Алишер Саъдуллаев вазирлик тасарруфидаги Республика болалар кутубхонаси фаолияти билан танишди.
Алишер Саъдуллаев кутубхона фаолияти билан яқиндан танишар экан ундаги бир қатор имконтиятларни санаб ўтди.
Вазир ўринбосари мазкур масканда бир қатор ўзгаришлар қилиш орқали у ерни ўқувчиларнинг энг севимли масканига айлантириш мумкинлигини қайд этди.
“Эшикдан кириб келишдан тортиб то китобни топиш, мутолаа хоналари, кутиш жойлари, китобларнинг тахланиши, хоналарнинг жиҳозланиши ҳамма ҳаммаси ўқувчи учун қулайлик туғдириши керак. Бола кутубхонада ўзини ўз уйиданда эркинроқ ва қулайроқ ҳис қилмоғи лозим.
Республика болалар кутубхонасида ҳам хоналарнинг дизайни, ундаги жиҳозларнинг жойлашуви, катологлар тўплами, китобларнинг ўрнатилишини замонавий услубда қайта кўриб чиқиш мумкин. Кейин болалар кутубхонасига озгина тоза ҳаво керак. Ёритиш тизимини ҳам янгиласа бўлади. Кутубхона ҳовлисини кўкаламзорлаштириб, очиқ осмон остида мутолаа қилиш шароитини яратишга интилиш керак. Бу китобхонларга жудаям манзур келади, ўзимдан қиёс қилишим мумкин. Кейин бу ерда мўъжазгина “bооkcаfе” ташкил қилинса, нур устига аъло нур бўларди.”
Кутубхонада ўқувчилар қамровини кенгайтириш юзасидан Алишер Саъдуллаев бир қатор таклифларни берди:
1. Биринчи галда болаларни китобга бўлган меҳрини ошириш учун мунтазам турли танловлар ташкил этиш керак;
2. Яна бу ерда “Моvie ёки Speaking club” шунга ўхшаш тўгараклар ташкил этиб, уларга иқтидорли талабларни жалб қилиш, улар иштирокида болалар учун бепул машғулотларни олиб бориш;
3. Қолаверса, таниқли болалар шоир ва ёзувчилари, спорт, санъат ва бошқа соҳанинг кўзга кўринган вакиллари иштирокида турли учрашувлар ўтказиш;
4. Замонавий услубда китобхонларга хизмат кўрсатиш усулларини қўллаб, жаҳоннинг энг машҳур кутубхонларидан андоза олиб ўзимизда қўллаш керак;
Ушбу ташриф самараси ўлароқ Алишер Саъдуллаев янги креатив усулдаги китобхонлик танловини эълон қилди.
Танлов шартлари жудаям осон, унда ўзбек ва рус тилларида турли саволлар берилади, викторина ва қизиқарли шартлар ўтказилади. Батафсил маълумотни Республика болалар кутубхонасининг расмий саҳифасидан билиб олишингиз мумкин.
“31 кун давомида ҳар куни 2 нафардан ғолиб иштирокчи аниқланади ва унга ўзбек ва рус тилларида энг сара асарлар совға қилинади. Айтганча, ой охирида танловда мутлақ ғолиб бўлган иштирокчига шахсан ўзим совға бераман ҳамда Республика болалар кутубхонаси бўйлаб кичик экскурсия уюштиришни режалаштирганман.”
Айни дамда вазирлик тасарруфидаги Республика болалар кутубхонаси фаолияти билан танишдим. Тошкентнинг қоқ марказида жойлашган мўжазгина бино пойтахтлик ўқувчиларга зиё улашиб келмоқда. Кутубхонада 200 мингдан зиёд китоб фонди мавжуд. Айни дамда мазкур маскан 13 мингдан ортиқ китобхонларга хизмат кўрсатиб келмоқда.
Эслатиб ўтамиз, 30 июнь куни бўлиб ўтган “Камолот” ЁИҲ съезди чоғида Алишер Саъдуллаев Ўзбекистонда чет тилларини ўрганиш истиқболлари юзасидан ўз таклифлари билан Шавкат Мирзиёевга мурожаат қилганидан сўнг Президент уни халқ таълими вазири ўринбосари этиб тайинлашга кўрсатма берган.
