Қизчанинг тўлиқ исми-шарифи Ангела Меркель Муҳаммад бўлиб, Ангела исми, Меркель эса иккинчи номи ҳисобланади, деб хабар берди Tass.ru нашри.
Германиянинг жанубий қисмида яшовчи суриялик эр-хотин дунёга келган қизалоқларини ГФР канцлери шарафига Ангела Меркель, деб атади. Қизча 16 август куни Мюнстер шаҳрида туғилди.
Муҳожир оила 2015 йилда Суриядан Германияга келган. Ўшанда Европага муҳожирлар оқими ёпирилган, натижада кунига Германияга 10 минг нафардан ортиқ муҳожирлар келган, бу воқеалар Меркель рейтингининг тушишига, мамлакат фуқароларининг норозилигига сабаб бўлган эди. Бора-бора барча норозиликлар барҳам топди.
Мюнстер шаҳридаги авлиё Франциско клиникаси вакилининг маълумот беришича, суриялик оила мазкур ҳаракати билан Германия канцлерига ўз миннатдорчилигини билдирган. Бу муҳожирларнинг Германия канцлерига нисбатан билдирилган илк миннатдорчилиги эмас, 2015 йилда ганалик муҳожирлар ҳам қизларини мазкур ном билан аташган эди.
