27.11.2013 14:04
Таиланд фуқароси “iPhone”ни зарядловчи қурилмадан ўлди
Полициячиларнинг сўзларига кўра, у каравотда ётган бўлиб, қўлида зарядлаш қурилмасига уланган "iPhone 4S” аппарати бўлган. Унинг қўллари ва кўкрагида бир нечта куйган жойлар борлиги аниқланган.
Дастлабки маълумотларга қараганда, ўлим зарядловчи қурилмадаги электр токи уриши натижасида юз берган, деб ёзади “The Bangkok Post”. Йигитнинг жасадини воқеа содир бўлганидан кейин эрталаб унинг отаси топган. Отанинг сўзларига кўра, у якшанба куни кечқурун соат 11 лар атрофида ўғлининг қичқириғини эшитган, бироқ бунга эътибор бермаган, чунки у уйқусида тез-тез гапириб турган. Ўлимнинг аниқ сабаблари жасад ёриб кўрилганидан кейин маълум бўлади.
Эслтиб ўтамиз, бу зарядловчи қурилма ўлимга олиб келган биринчи воқеа эмас. 2013 йил июль ойида зарядловчи қурилмага уланган “iPhone 5” орқали гаплашаётган хитойлик 23 ёшли стюардесса Ма Айлюнь ҳам электр токи уриши натижасида нобуд бўлганди. Ўшанда марҳуманинг қариндошлари “Apple”ни судга бериши ҳақида маълум қилган, бироқ олиб борилган тергов ишлари аёл бошқа зарядловчи қурилмадан фойдалангани учун ҳалок бўлганини аниқлади.
Тахминан ўша пайтда пекинлик фуқаро ҳам ўз “iPhone 4”ни зарядлашга уринаётган пайтда ток уриб ўлишига сал қолган. У касалхонада ўн кундан ортиқ кома ҳолатида ётади. Ўшанда ҳам смартфон учун зарядловчи қурилма “Apple”нинг расмий маҳсулоти бўлмагани аниқланди.
Матбуотнинг қайд этишича, смартфонлар учун қалбаки зарядловчи қурилмаларни Хитойда бор-йўғи 4 юанга (65 Америка центи) сотиб олиш мумкин, "Apple”нинг қонуний маҳсулоти эса 150 юанга яқин туради.
