Хитой сунъий йўлдоши Malaysia Airlines авиакомпаниясининг йўқолган Boeing самолёти қулаши мумкин бўлган жойни аниқлади.
Самолёт Куала-Лумпурдан шимолий-шарқ ва Вьетнамдан жанубда қулаган бўлиши мумкин, дея хабар беради CNN канали.
Туширилган суратда йўқолган лайнернинг бўлаги бўлиши мумкин бўлган учта жисм кўринган. Сурат Хитой давлат илм-фан бошқармаси ҳамда Мудофаа вазирлиги томонидан тақдим этилди. Хабар қилинишича, сурат Boeing йўқолганидан бир кун ўтиб тасвирга туширилган, аммо фақатгина бугун айтилган.
Суратдаги энг катта жисм ҳажмининг узунлиги 24 метр ва эни эса 22 метрни ташкил қилади.
Рейтер ахборот агентлигининг хабар қилишича, лайнернинг қулаши мумкин бўлган жойга Вьетнам қидирув-қутқарув хизмати қайтадан юборилади.
Бироқ қидирув операцияси вақтида Хитой сунъий йўлдоши томонидан кўрсатилган жойда самолёт қолдиқлари топилмади. Бу ҳақда Reuters ахборот агентлиги хабар бермоқда.
Қайд этишларича, Вьетнам ҳарбий ҳаво кучларининг иккита қидирув самолёти Хитой сунъий йўлдоши томонидан кўрсатилган ҳудудни икки марта айланиб, текшириб ўтган ва йўқолган самолёт билан боғлиқ бирорта жисм топмаган.
Эслатиб ўтамиз, 8 март куни Малайзия авиакомпаниясига тегишли бўлган самолёт парвозга чиққанидан икки соат ўтиб, сирли тарзда ғойиб бўлди. Boeing бортида 14 мамлакатдан 239 киши бўлган.
