“Куала-Лумпур – Пекин” йўналишида парвоз қилган Malaysia Airlines авиакомпаниясига тегишли бўлган Boeing 777-200 самолёти Ҳинд океанида ҳалокатга учрагани маълум бўлди.
Бу ҳақда 24 март куни Малайзия бош вазири Нажиб Тун Раззоқ расман маълумот берди.
Самолёт 8 мартга ўтар кечаси Жанубий Хитой денгизи устидан учиб ўтаётган пайтда радар экранларидан йўқолиб қолган эди.
Вазирнинг сўзларига кўра, самолёт Ҳинд океанининг жанубий қисмида ҳалокатга учраган йўловчи ва экипаж аъзоларидан ҳеч бири омон қолмаган. Қурбонларнинг оила аъзоларига бу ҳақда ахборот берилган.
Эслатиб ўтамиз, самолёт бортида 227 нафар йўловчи ва 12 экипаж аъзоси бўлган.
