Ҳалокатга учради дея расман эълон қилинган Boeing 777 йўловчиларининг яқинлари Хитойдаги Малайзия элчихонасида қарши намойишлар билан чиқишди. Ушбу вазият полиция ходимлари билан тўқнашувга олиб келди, деб ёзади South China Morning Post нашри.
Кеча 17 кун аввал йўқолган Malaysia Airlines самолётининг Ҳинд океанига қулагани ҳақида хабар берилди. Буни сунъий йўлдошдан олинган маълумотлар тасдиқламоқда. Бироқ йўловчиларнинг яқинлари Малайзия ҳукуматини ёлғон маълумот берганликда айбламоқда. Йўловчиларнинг яқинлари Малайзия ҳукумати уларни тергов давомида бир неча бор чалғитишга уриниб, йўловчилар тақдири ҳақида аниқ маълумот беришмаяпти деб ҳисоблашмоқда.
Бундан ташқари уларнинг норозилигига лайнер қулагани ҳақидаги расмий баёнот уларга қарата эмас, ОАВларга берилгани сабаб бўлди.
“Биз қидирув ишларини тўхтатмаймиз, керак бўлса Хитой давлат кенгаши вазирига мурожаат этамиз. Биз уларни топамиз”, - дейди йўқолган лайнер йўловчиларидан бирининг яқини.
The Daily News нашрининг хабар қилишича, Malaysia Airlines авиакомпанияси Boeing 777-200 йўловчиларининг ўлими ҳақида уларниинг яқинларига СМС орқали хабар берган.
“Malaysia Airlines бўлган воқеа юзасидан чуқур таъзия изҳор қилади. Аммо ҳеч шубҳасиз бу рейс йўқолгани ва бортда бўлганлар омон қолишмаганлигини тан олишимиз лозим”, - дейилади юборилган хабарда.
Шунингдек, Ҳалок бўлганларнинг оила аъзоларига 5 минг АҚШ доллари миқдорида товон пули ваъда қилинди.
