Бурак Озчивит — Бэтмэндан Камрон ва Камолга айланган йигит

«Севги изтироби»нинг бош қаҳрамонларидан бири Камол ҳақида гаплашишга қарор қилдик. Бурак Озчивитнинг шахсий ҳаёти ва ижодий йўли кўпчиликни қизиқтириши аниқ. Марҳамат, Туркия кино оламини Ромеоси бўла олган актёр ҳақидаги маълумотларни эътиборингизга ҳавола этамиз.

«Бэтмен бўламан!»

Бурак Озчивит 1984 йил 24 декабрда соҳил бўйида жойлашган Мерсин шаҳарчасида туғилган. Кўп ўтмай Озчивитлар оиласи Истамбулга кўчиб ўтишади. Шунинг учун ҳам кўпинча актёр ҳақида сўз кетганда уни пойтахтда туғилган, дея маълумот беришади. Отаси хусусий тадбиркор, онаси уй бекаси бўлган. Актёр ўзидан 5 ёш катта опаси билан бирга улғайган. Онасининг сўзларига кўра, Бурак болалигидан кино оламига ихлосманд бўлган. Телевизор қаршисидан жилмасдан мулътфильмларни томоша килишни ёқтирар, кичкинтойнинг ҳар қандай инжиқлигига ҳам айнан шу йўл билан барҳам бериш мумкин бўлган. «Унинг энг севимли мультқаҳрамони Бэтмен эди. «Улғайганингда ким бўласан?» десак, «Одамларни ёмонлардан қутқарувчи Бэтмен бўламан», дерди доим», дея фарзандининг болалик йилларини эслаганди актёрнинг онаси. Ёши бироз улғайгач эса Буракнинг эътиборини спорт торта бошлади. Бугун турк сериаллари юлдузига айланган йигитнинг ўсмирлик даври футбол майдони ва спорт залида ўтган.

Отасининг ниятини амалга оширди...

Ўрта мактабни тамомлаган Бурак Мармара университетининг кино, тасвирий санъат ва фото факультетига ўқишга киради. Соҳа бўйича илк гонарарлари моделлик йўналиши орқали топган актёр 5 йил — 2003–2007 йиллар оралиғида реклама роликларининг энг кўзга кўринган модели эди. Ҳатто, 2003 йил «Туркиянинг энг яхши модели» совринини, 2005 йилда дунё миқёсидаги танловнинг иккинчи ўринни қўлга киритди. Машҳур актёр интервьюларида моделлик бизнесини танлашига дадаси сабабчи бўлганини таъкидлайди. «Дадам билан телевизор кўриб ўтирганимизда, подиумда юрган йигитларга ҳавас билан қараган. Агар сени ҳам шу ерда кўрсам, жуда фахрланар эдим» дегани ҳалигача эсимда», дейди Буракнинг ўзи.

«Навбат, ўзимнинг орзуларимга!»

Мода оламидаги омадли фаолияти туфайли Бурак режиссёрларнинг эътиборига тушди. Оқибатда, болаликдаги орзусига эришади. У энди нафақат, модель сифатида тилга олиняпти, балки актёр, деган таърифга эга бўлди. Озвичит илк ролини ўсмирлар учун суратга олинган «Минус 18» триллер фильмида ижро этган. Орадан бир йил ўтмай, Эронлик ижодкорлардан мелодрама жанридаги фильмда суратга тушиш таклифини олган. Эронликларнинг «Вақтинчалик эр вазифасида» картинасидан сўнг «Заҳарланган», «Оилавий уй» комедиясида, «Сотқинлик» номли психологик драмада ва «Кичик сирлар» сериалида кўриниш берди. Унинг ижодий фаолиятига катта муваффақият олиб келган роли «Муҳташам юз йил» сериалида бўлган. У ерда Бурак афсонавий лашкарбоши Балибейни ижро этган. Ундан сўнг иккинчи омадли кинолойиҳа — «Чолиқуши» сериали қайта экранлаштирилганда бош қаҳрамон Камронни гавдалантирди. Сериалдан сўнг кенг миқёсда машҳурликка эришган актёр янги ролларини узоқ кутмади. «Муҳаббат сенга ўхшайди» мелодрамаси, «Кабутар учмоқда» ситком комедияси ҳамда «Севги изтироби» сериаллари экранларда кетма-кет намойиш этила бошлаган. Шу тариқа актёр қисқа вақт ичида дунёга машҳур инсонга айланди.

Гумонларга бой журналистнинг қизи

Иш фаолияти давомида шахсий ҳаётини ҳам унутмаган модель-актёр доим журналистлар диққат марказида. У узоқ вақт давомида моделликдаги ҳамкасби — Жейлан Чапа билан учрашиб юрган. Жейлан жуда машҳур турк журналида фаолият юритувчи журналистнинг қизи. Бурак Озчивит ва Жейлан Чапа ўртасидаги муносабатларни кўпчилик шунчаки ишдаги ишқ сифатида баҳолашган. Аммо улар ҳар бир интервьюси ва учрашувларда муносабатларини расмийлаштиришларини кўп бора тилга олишарди. Жейланнинг кучли рашки уч йиллик муносабатларга путур етказа бошлаган. У доим Буракни бевафо дея шубҳа-гумонларга кўмилиб, йигитнинг изидан таъқиб қиларди. Табиийки, қорақош йигитга бу ёқмаган ва улар тинимсиз жанжалашишган. Бурак «Чолиқуши» сериалида суратга туша бошлагач, муносабатлар янада таранглашди. Жейланга Буракнинг Фахрия Эвжен билан бирга роль ўйнаётгани умуман ёқмасди. Ошиқ қиз сериалнинг суратга олиш жараёнини узоқдан, яширин кузатаркан, ақлдан озишига бир баҳя қоларди. Жейлан учун охирги томчи — «Муҳаббат сенга ўхшайди» фильмига сёъмка ишларининг бошланиши бўлди. Чунки бош роль ижрочиси ва фильм продюссери Бурак картинадаги бош қаҳрамонни ижро этиш учун севгилисини эмас, «Чолиқуши»даги «муҳаббати» Фахрияни таклиф этди. Шундан сўнг Жейлан Озчивит билан айрилишганини расман эълон қилди. Актёрнинг ўзи «Бу қарорни Жейлан қабул қилди. Менинг айбим йўқ» дея изоҳ берган, холос. Бироқ фильм премьерасига Эвженнинг қўлидан ушлаб ташриф буюришгач, ҳаммаси ойдинлашди — Жейланнинг ёнганича бор экан. Бурак ва Фахрия ўртасида илк учрашувнинг ўзидаёқ севги учқунлаган.

Эртакнамо ҳаёт бошланди!

Фахриянинг ҳам феъли ўзига яраша эканлигини журналистлар бот-бот эслатиб туришади. Актриса ҳам инжиққина. Аммо Бурак билан муносабатларда у ўзини аксинча кўрсата олди. Ҳатто, журналистларга «Севгилимнинг ўз қизиқишлари бор. Ундан одатларидан воз кечишни талаб қилмайман. Мен уни ўзим танладим, шунинг учун бошқа одамга айлантиришнинг ҳожати йўқ. Эркак, уни ўзгартиришга ҳаракат қилган аёл билан бахтли бўлолмайди», деган эди.

Икки ижодкор ўртасидаги муносабатлар тез суръатда элга маълум бўлди. Улар бир-бирини оиласи билан таништириб, муҳаббатлари ҳақида жар солишди. Янги уй, совға-саломлар, умуман олганда, улар учун худди эртаклардаги ҳаёт бошланди. Туркия ОАВсини диққатини тортган воқеалардан бири эса актёрнинг севгилисига 12 минг евролик тақинчоқни совға қилгани бўлди. Улар, ҳатто, машиналарининг рақамларини ҳам бир-бирининг исмига мослаб ўзгартиришган. Бурак ҳаётда ҳам худди фильм қаҳрамонлари каби романтик йигит бўлиб чиқди. У ўзининг туғилган кунида, Фахрияга турмуш қуриш таклифини айтади. Барча яқинлари ва дўстлари даврасидаги бу воқеа тарихга муҳрланди. 2016 йил 24 декабрь улар муносабатларини расмийлаштиришга қарор қилишган. Бу кун актёр Фехрияга 26 минг долларлик узук совға қилгани эса ҳаммани ҳайратга солган.

Буракнинг илк шартлари

Бу қувончли воқеалардан сўнг улар ҳақидаги илк нохуш миш-мишлар тарқала бошлади. Туркия сайтлари ёзишича, икки ёш тўйдан кейинги асал ойини қаерда ўтказиш борасида тортишиб қолишганмиш. Айтишларича, Фахрия Мальдивада дам олишни истаган, Бурак эса бундай катта харажатларга ҳожат йўқлигини айтган. Хуллас, актёр бўлажак оила боши сифатида, актрисанинг ижодий фаолиятига ҳам аралаша бошлаган. Шунингдек, матбуотдаги тахминларга кўра, унаштиришдан сўнг суратга олиш ишлари бошланган «Сўнгги нафасимгача» сериалида Фахрияга баъзи саҳналарида суратга тушишни тақиқланган. Лекин бу ҳақида ижодкорларнинг ўзлари аниқ изоҳ беришмаган.

85 минг евролик тўй!

Севишганларнинг тўйи 2017 йил 29 июнда бўлиб ўтган. Маросим Истамбулдаги Босфорс кўрфазининг соҳилида жойлашган энг муҳташам виллаларидан бирида ўтказилди. Тадбирда 500 та меҳмон иштирок этган бўлиб, ташриф буюрганларнинг ҳар бирига ўртача 170 евро сарфлангани ҳақида ҳам тахминлар йўқ эмас. Умумий ҳисобда эса тўй маросими машҳурларга 85 минг еврога тушган. Ахир келин нақ уч марта либос ўзгартирган. Кўйлакларнинг ҳар бири энг машҳур дизайнерлар томонидан махсус яратилган.

Шу тариқа икки машҳур ижодкорнинг тўйи оламшумул тарзда бўлиб ўтди. Асал ойи учун эса Фахрия истагандек Мальдивага учиб кетишган. Ижодий янгиликларга келсак, Бурак Озчивит иштирок этган янги кинолойиҳа «Менинг укам-2» оилавий фильми 27 ноябрь премьера қилиниши кутилмоқда. Фахрия эса ҳозирча реклама роликлари билан чегараланаяпти.

ФАКТ

Актёр болаликдаги қизиқишларидан бири футболга бугун ҳам бефарқ эмас. Бўш вақти бўлди дегунча яшил майдонга шошади. Шунингдек, у ретро-автомобиллар коллекционери ҳамдир. Бурак ота касби тадбиркорликнинг-да бошидан тутган. У Истанбулдаги «Balibey Döner» номли ресторанининг эгаси.