Аввал хабар берганимиздек, Шавкат Мирзиёев 9-10 март кунлари расмий ташриф билан Тожикистонга боради. Ташриф чоғида Ўзбекистон Президентига Тожикистон миллий университетининг фан доктори фахрий унвони берилиши кутилмоқда. Шунингдек, турли соҳаларда икки томонлама ҳамкорлик масалалари кўриб чиқилиб умумий қиймати 15-20 миллион доллар бўлган 20 дан ортиқ ҳужжат имзоланиши режалаштирилган.
Ўзбекистон президенти Шавкат Мирзиёевнинг Душанбега биринчи давлат ташрифи доирасида Ўзбекистон ва Тожикистон санъат усталарининг «Дўстлик оқшоми» деб номланган концерт дастури намойиш этилади. Тожик ОАВнинг хабарига кўра, президентлар учун Юлдуз Усмонова куйлайди.
Хабарда айтилишича, концерт 9 март куни «Кўҳи Борбад» киноконцерт мажмуасида бўлиб ўтади. Концертда ўзбекистонлик санъаткорлардан шунингдек, Шерали Жўраев, Фаррух Зокиров, Озодбек Назарбеков чиқиш қилади. Тожикистондан Давлатманд Холов, Нигина Амонқулова, опера қўшиқчиси Рустам Дулоевлар саҳнага чиқиши режалаштирилган.
Эслатиб ўтамиз, Шавкат Мирзиёевнинг Тожикистонга илк давлат ташрифи 9-10 март кунларига мўлжалланган. Ташриф арафасида Душанбеда Ўзбекистонда ишлаб чиқарилган маҳсулотлар кўргазмаси бўлиб ўтади.
