Хитойлик аёл бедаво дардга чалинган эрида ҳаёт нишоналари кўринмагач, уни ўлди деб ўйлаб ўликхонага юборди, деб хабар берди Ria.ru нашри.
Воқеа Хитойнинг Хубэй провинциясидаги Шиянь шаҳрида рўй берди. Хуан фамилияли эркакда ошқозон саратонининг сўнгги босқичи аниқланган. Эрта тонгда уйғонган Хуаннинг рафиқаси уни уйғотишга ҳаракат қилган, бироқ эркак кўзини очмаган. Шундан кейин аёл уни кечаси ўлган, деб ўйлаган ва дафн этиш хизматига қўнғироқ қилган. Ўз навбатида дафн этиш хизмати эркакни ўликхонага олиб кетган.
Эркакни дафн этишга тайёрламоқчи бўлган ўликхона ходимлари уни кийинтираяётганда бармоқлари қимирлаётганини сезиб қолишган. “Жасад”нинг пульси текширилганда унинг тириклиги маълум бўлган. Улар тез ёрдамга қўнғироқ қилишган, аммо тиббиёт ходимлари етиб келгунга қадар эркак оламдан ўтган.
“Бу менинг амалиётимда рўй берган учинчи ҳодисадир”, деди дафн этиш хизмати бошқарувчиси. У ўликларнинг барча яқинларига дафн этиш хизматига мурожаат этишдан илгари жасаднинг пульсини диққат билан текширишни маслаҳат берди.
